Науырзым аудандық балалар кітапханасы Наурызым мемлекеттік табиғи қорығымен және Докучаев орта мектебінің 8-сынып оқушыларымен бірлесіп, «Экоумник - 2024» табиғат білгірлерінің турнирін ұйымдастырды.

«Солнце» және «Книжные черви» атты екі командаға бөлінген қатысушылар – сегіз кезеңнен өтіп, табиғаттың таңғажайып әлеміне саяхат жасады. Оларды қызықты сұрақтар мен көңілді ойындар қарсы алды.

Экологиялық турнир балаларға табиғатты қорғау және экология тақырыптары бойынша өз білімдерін көрсетіп, әртүрлі сұрақтарға жауап беру мүмкіндігін сыйлады. Балалар «Экологиялық викторина», «Постерлер байқауы», «Қоқысты сұрыптау», «Экологиялық жұмбақтар», «Табиғат дыбысын тап» ойындарына қатысып, өсімдіктер мен жануарлар туралы викторина сұрақтарына, сондай-ақ табиғатқа қатысты қызықты деректерге жауап берді.

Қазылар алқасы қорытындысы бойынша, «Книжные черви» командасы жеңімпаз атанып, «Экоумник - 2024» атағына ие болды. Сонымен қатар, мадақтамалармен және Науырзым мемлекеттік табиғи қорығының сыйлықтарымен марапатталды.

Табиғат білгірлерінің турнирі өте қызықты өтіп, әрі танымдық маңызы зор болды.